كيفية العناية بأدوات التجميل؟!

النهارده هنتعرف على طرق العناية بأدوات التجميل واستخدامها...

وبصفة عامة بتلاقي إن فيه حاجتين اثنين بيسببوا فساد؛ أدوات التجميل هما: الضوء، ودرجات الحرارة العالية..

فياريت إنك تحطي أدوات التجميل في مكان بارد وليكن حتى الثلاجة علشان
تقدري تحافظي عليها لأطول فترة ممكنة، ولازم تاخدي بالك إنك تقفلي أدوات
التجميل كويس جداً لأن الهواء العادي فيه ميكروبات ممكن تسبب فساد لأدوات
التجميل...

وعلى فكرة كل أداة من أدوات التجميل لها تاريخ صلاحية بيختلف عن
الأخرى، علشان كده أنصحك أول ما تيجي تفتحي أي مستحضر تجميل تحطي عليه
ورقة صغيرة مكتوب فيها تاريخ بداية الاستخدام، علشان تقدري تعرفي تاريخ
نهاية صلاحيته، وده لأن فيه أدوات تجميل كتير صلاحيتها بتنتهي بعد مرور
سنة من فتحها واستخدمها.

وياريت ما تتأثريش بالدعاية الموجودة في التليفزيون والراديو وأنت
بتشتري مستحضرات تجمليك، لأن الأدوات المعلن عنها ممكن تكون غير مناسبة
ليكي، وعلى فكرة أنت ممكن تحصلي على أدوات التجميل المناسبة لك من محلات
التجميل أو الصيدليات القريبة منك.

وده جدول فيه معلومات عن تاريخ صلاحية كل أداة من أدوات التجميل
وكيفية استخدامها؟!

الكريم المرطب	بيتم الاحتفاظ به لمدة سنة كاملة من بداية فتحه، وياريت تستخدميه يوميا لترطيب بشرتك... وأفضل طريقة لاستخدام الكريم المرطب: هو إنك تستخدميه عن طريق قطنة، واوعي تدخلي أصابعك داخل علبة الكريم، علشان الميكروبات الموجودة في إيدك ممكن تتسبب في فساد الكريم قبل مرور العام.

المنظف السائل	البعض بيطلق عليه اسم الحليب المنظف أو مزيل الماكياج... وده أيضاً يستخدم لمدة عام، ولكن بشرط إنه يكون بعيد نهائي عن درجات الحرارة العالية، لذلك يفضل وضعه أثناء الصيف في الثلاجة.

التونيك	صالح لمدة عام من بداية استخدامه، ويفضل الاحتفاظ به في الثلاجة، أو أي مكان لا يكون به درجة حرارة عالية.

كريم العين	يستخدم حوالين العين، لمكافحة ظهور التجاعيد مبكرا حول منطقة العين... ويوضع في الثلاجة لمدة سنة واحدة من بداية استخدامه، وعلى فكرة الثلاجة مش مهمة فقط للحفاظ على كريم العين، ولكنها مفيدة لزيادة فاعليته.

الماسكات	أيا كان نوع الماسكات اللي عندك، فياريت ماتستخدميهاش بعد مرور عام من فتحها... وياريت تبعديها عن الشمس والحرارة، وتحتفظي بها في الثلاجة.. كمان كريمات الحماية من أشعة الشمس ما تستخدميهاش غير لمدة صيف واحد لأن أشعة الشمس والضوء والحرارة بتفسدها بسرعة.

كريم الأساس	بيتم الاحتفاظ به لمدة عام واحد من تاريخ الاستخدام، وده لأن الميكروبات بتنمو فيه بسرعة خاصة لو كنت بتستخدميه بأصابعك... وياريت تتجنبي استخدام الأصابع في وضع كريم الأساس، وتستبدليها بإسفنجة صغيرة مخصوصة لكريم الأساس، والإسفنجة دي بتقعد معاكي لمدة عام، وطبعاً بتغسليها وتنشفيها كل ثلاث مرات من استخدمها، وبصفة عامة لازم قبل ما تحطي أي كريم أساس تغسلي إيدك كويس.

البودرة	دي ممكن تستخدميها لمدة سنتين، بشرط إنك تحرصي على نظافة بدارة البودرة باستمرار.

البلاشر أو أحمر الخدود	ممكن تستعمليه لمدة ثلاث سنوات، بس خدي بالك إنك تغسلي الفرشاة من فترة للثانية للقضاء على أي ميكروبات ممكن تتواجد داخل الفرشاة، وتنشفيها في الشمس أو بالسشوار.

المانيكير	لازم تحتفطي به في مكان بارد لمدة عام، ويكون مغلق جيداً، وياريت تنظفي حوالين زجاجة المانيكير باستمرار باستخدام الأسيتون.

الروج أو أحمر الشفايف	مالوش مدة صلاحية محددة وممكن يفضل معاكي لغاية ما ينتهي، بس لازم تمسحي حواليه بمنديل بعد كل مرة بتستخدميه فيها.

أقلام الحواجب والروج	ممكن تحتفظي بيها من سنة لسنتين، وده لأنك بتبريها وبتنظفيها على طول.

البارفان	ممكن تحتفظي به لمدة سنة، شرط إنه يكون بعيدا عن الحرارة والشمس علشان ما يتأثرش بيهم.

إنه مش شرط أبدا إن أحسن أنواع مستحضرات التجميل تكون أشياء غالية الثمن لكي تحصلي على الماكياج المناسب...

لأنك ممكن تحصلي عليه من أشياء بسيطة جدا، بس بشرط إنك تستخدميها بالشكل صح... ...

» وصفات للبشرة والجسم من خبيرة التجميل ايناس حشيمة
» كيفية شد الصدر ... موضوع مميز
» كيفية التخلص من الحب وبقع السوداء بالجسم
» كيفية زيادة وزن الشخص النحيف ؟ كيف تزيد من وزنك ؟